الجزء التالث
مكاين ما ولكن قررت نكمل قرايتي على برا طاحت عليا هاذ الفكرة ولكن باقي مقلتهاش للواليدة و الواليد مغاديش يبغيو ليا صعيب نقنعهم ولكن عندي 3 الشهور د الصيف خاص نقنعهم فيها شي مرات كيبقاو يسولو فيا شنو لي ناوي ندير و كذا كنبقا نخرج وندخل فالهضرة تال واحد المرة جيتهم كيف كيجي الكار من خنيفرة زعما جيتهم نيشان هاذ المثل انا لي ختارعتو عقلو عليه ماعلينا جيتهم نيشان قلت ليهم انا مكنتخايلش مستقبالي هنا فالمغريب و ناوي نكمل قرايتي على برا غي سمعاتها الواليدة بدات كتحلف عليا وانا ديجا عارف ردة الفعل ديالها كي غتكون المشكل غنلقاه غي مع الواليدة صو هي لي خاصني نقنعها كل نهار كنبقا نشرح ليها المغريب مافيه والو كذا الطن من هنا الطن ملهيه والو السيدة بحالا كتهضر مع شي حيط فخنيفرة اما الواليد قاليا شوف مع ماماك انا معنديش مشكل بقيت كنطلب فيها تخليني شحال وانا نطلب و نرغب بزز باش خلاتني ولكن بشروط طبعا مهم بقا خاصني نختار غي البلاد لي نمشي ليها الفلوس كاينة كلشي كاين كترو عليا السميات ها فرانسا ها ميريكان ها اوكرانيا ها خنيفرة معرت مالي مع خنيفرة فهاذ الجزء ماعلينا بديت كنقلب فالأنترنيت ونسول و كذا بانت ليا غا فسويسرا غنقرا دكشي د الكوميرس و والمقاولات وكذا صافي درت قدامي الطريق لي غنمشي فيها قررت شنو غندير الصيف قرب يسالي تقيدت فالجامعة لي غنقرا فيها فسويسرا باغ انترنيت بقا غا شي توثيق وشي تخربيق غنقادو ملي نوصل لتما الصيف داز زاهي مع شديت الباك بنقيطة مزيانة من صغري طالع قراي ولكن معقد معنديش مع البنات وحتا الصحاب واحد الشخصية ولات عندي فشكل قبل ميموتو والديا وكذا مكنتش هاكا حتا فالقرايا كنت عادي كنجيب غا الخمسوات و الربعوات فالإبتدائي ولكن الضروف لي وقعو ليا بدلوني بالبيان داز الصيف وصل النهار لي غنمشي فيه لسويسرا ديجا شرطات عليا الواليدة غتمشي معايا هي و الواليد و الخوادرية الصغير لتما لسويسرا حجة وزيارة غيوقفو على التفاصل فين غنسكن فين غنقرا و داك الحزاق كلو عاد غيرجعو للمغريب فهاذ ليامات جا علبالي خاليد و راصي باقي ضارني من جيهتو يكما يكون مات بصح كنرجع الدكريات اللور تفكرت نهار عطاني مروان صاحبو ديك الرسالة باقي محافض عليها هي دير ليا واحد القضية الطن فراصي ملي مشينا للحبس داك النهار كان قالينا داك العمدة بلي سيمانة باش غبر الخوادري فالحبس وفنفس النهار لي مشينا لداك الحبس عطاني مروان الرسالة وقاليا صيفطها لك خوك من الحبس علاش تعطل عليا مدة سيمانة عاد جاب ليا الرسالة اذا شي بلان كاين تما و 100% مروان غيكون عارف ولا على الأقل عندو شي تفسير منطقي تفكرت النمرة لي كان عطاني ولكن دازت عليها سينين مكاينش شي مغريبي غيحتافض على نفس النمرة عشرسنين ومع ذلك قلبت عليها النهار كلو وانا نقلب قلبت فكاع التيليفونات لي فالدار لقيتها فالتيليفون تاع الواليد منهار عقلت عليه مبدل ديك النمرة خديتها صونيت عليها ولكن مخداماش حاجة باينة مخداماش راه سينين دازت عليها الموشكيلة معارف تا فين نقلب عليه قررت نخوي بالي مؤقتا حتا نكمل قرايتي و نتفرغ لهاذشي او زايدون الى خاليد حي علاش ميجيش عندي يشوفني ولو مرة خوه انا زعما نسيت هاذ القضية تنسالي ليها شي يامات شدينا الطيارة لسويسرا مشاو معايا أول مرة غنعتب فالطيارة احساس مقود ملي كتخلي كلشي وراك و كتمشي تقلب على راصك فبلاد خرا بزااف متاحتش ليهم هاذ الفرصة حتا الخواذري خاليد نيت متاحتش ليه الفرصة باش يمشي على برا فالعمر ديالي وهاني دابا غادي بفلوسو ايوا شنو يضيعو على الأقل يستافذ منهم شي واحد واخا على ود دوك الفليسات ضحا بالغالي و النفيس لي غنواعدو هو التضحيات ديالو مغاديش يمشيو هباء منتورا حالف تنقلب عليه هاذشي لاكان باقي الحياة و نعطيه فلوسو مهم وصلنا لسويسرا نيشان لواحد لوطيل منوراها بشي يامات مشينا للكلية لي غنقرا فيها كملنا شي اجراءات خلصنا لي غيتخلص بقا لنا غا نلقاو شي دار على قدي نسكن فيها ديجا دايرين للطلبة الأجنبيين حي خاص بيهم وشي تسهيلات و كذا صراحة هاذ الناس قمة الإنسانية لقينا واحد البريطيمة صغيورة ديال 2 ولا 3 كاع لا كثرو ولكن هاذ البرطمات فخنيفرة كيسكنو فيها 6 و السابع داير بيت فالسطح مع مرتو اجي خنيفرة فيها البرطمات ولا الديور حيت انفوا نسمع خنيفرة كنتخايل جبال الهمالايا وقمة ايفيرست وداك البرنامج ديال من اجل البقاء تحية لناس خنيفرة ✌ مهم دوزت شي يامات فخنيفرة اودي سويسرا ولاهيلا مشا بالي مع خنيفرة مهم بلا منرجع نصححها دوزنا شي يامات فسويسرا نعاماس مع والديا و الكتكوتة الصغيرة ضرنا تسركلنا و كذا هوما رجعو للمغريب وانا بقيت هنا فسويسرا بدات القرايا لقيت مشكل فاللغة شوية ولكن معليش دغيا ولفت ولكن الملال ديال بصح بغينا شي ولد البلاد يونسنا باقي متلاقيت مع تاشي مغريبي واحد الليلة كنتسركل تما فلاسويس دزت من حدا واحد القهوى ولكن راه قهوة ماشي مقهى الأخوين لي فراص الدرب لي كتكون فيها سرباية لابسة استغفر الله كتخليوني نخرج على الخط نتوما ماعلينا دزت من حدا ديك القهوة حتا كنسمع صوت شي معلق مغريبي على شي ماتش مع دخلت كيبان ليا زياش زكل البيلانتي تفو دخلت بنحسي كون هلاها لبوصوفة حايد بانو ليا شي مغاربة تما ولكن مزعمت ندوي مع تاشي واحد راه قلت ليكم انا خجول ومعنديش مع العلاقات الإجتماعية هي هاديك جيت مع الماتش قرب يسالي بنادم بدا يمشي فحالاتو بنادم خارج معصب تانا غادي خارج فحالاتي ضرني الجوع تفكرت واحد الريسطو مافيا لي يطيب صراحة واحد الملال مقود شدني ميسحابليش القضية غتكون حامضة هاكا مهم مشيت لواحد الريسطو دخلت كوانيت فواحد الكوان حدا الجاج جا عندي السرباي كونصوميت تعشيت غادي باش نخلص لقيت واحد البنت لي شادا لاكيس عطيتها واحد البيي قالت ليا بالفرونسي طبعا حيت هوما كيهضرو بالفرونسي ولكن ماشي لغة رسمية حيت عندهم ربعة اللغات تقريبا كلشي كيهضر بيها كل منطقة معروفة بشي لغة كاينة الألمانية الفرنسية الإيطالية و واحد اللغة واقيلا أول مرة تسمع بيها الرومانشية داوي معاك اصاحبي الرومانشية سول عليها راه غتستافذو معايا فهاذ القصة ثقافة عامة و دكشي 😂 اه و العاصمة هي زيوريخ مهم نرجعو للخلاص قالت ليا عندك القدة وقدة جبدت البزطام عطيتها فلوس العشا كنتسناها ترد ليا الصرف مع مداتو ليا هو يتشرشم وانا كنتعصب دغيا اقل من حاجة نتعصب عليها عفويا قلت ليها بالداريجة تي مالك كترعدي يدك فيهم الصابون البلدي هي تقوليا ليا لاواه راه نتا لي فك بوتفتاف بين صباعك انا مديت مجبت قلت ليها الله يعطينا وجهك هي تسكت عاد سرا معايا البلان الدرية كتهضر بالداريجة قلت ليها اجي نتي مغربية قالت ليا وعلى كاين شي واحد كيهضر بالداريجة وماشي مغريبي قلت ليها مديش عليا راه مديت مجبت سهييت قالت ليا ماشي مشكل مرحبا قلت ليها يالاه بسلامة قبل مندير لك شي مشكل مع الشاف ديالك قالت ليا لا مكاين حتا شي مشكل قالت ليا منين نتا من المغرب قلت ليها من كازا قالت ليا اه مزيان انا من خنيفرة ملي سمعتها قالت خنيفرة بديت كنضحك قالت ليا مالك قلت ليها لا والو غتفكرت واحد صاحبي خرجت وخليتها كتشوف اصلا انا مكنعرفش نهضر مع البنات معندييش مع الجنس اللطيف تا اشمن لطيف تاراه عبد اللطيف شخصيا هاذي شي بنات الله يسمح ليهم كتسلم علك كتحير فيها واش ليد هاديك ولا كلامونيط و العكس تاني شي دراري كيسلمو علك بحالا سلمات علك سعاد لي خربق الإعدادات يرجعهم كي كانو بلا هاذ اللعب الباسل 😂 ماعلينا رجعت فحالاتي للبرطمة لي ساكن فيها لغد ليه قاري فايق على الصباح غادي لديك لافاك ولكن لافاك اخويا خليني من التخربيق لي فالمغريب قرينا ديك ساعتين مع خارج كنحس بشي واحد شدني من كتفي كنتلافت كتبان ليا غا ديك الخنيفرية لي خدامة فداك الريسطو زربات عليا السلام السلام كذا مفهمت والو يالاه غنجاوبها كنسمع تيليفوني كيصوني قلت ليها سمحي ليا واحد الدقيقة جاوبت كنسمع ديك الو وهاذ الصوت فايتلي سامعو قلت شكون معايا قاليا واش نتا المامون قلت ليه اه هو هذا قاليا انا مروان واش عقلتي عليا...يتبع 🌹
لا تشاهد و ترحل ، خلي تعليقك على القصص و النوع الذي تحبه من القصص.
سوف يتم الرد عليك خلال 24 ساعة.