قصة من قصص مجتمع المغربي

قصة مؤلمة

نزلي لي مشكلتي😔انا عمري 56 سنة مزوجة هادي 36 سنة ولادي كبار راجلي في عمري يعني انا بدأ يبان علي الكبر وهو لا. بلعكس عشنا احلى سنين العمر مع بعضنا عمرو ماكان خايب معايا حبينا بعضنا وعشنا ايام وأشهر وسنين في فرحة والناس كلشي كيحسدنا على زواجنا. هو يتيم من الصغر كنت انا حياتو وعايلتو والصدر الحنين والوذن الي تسمع والعين اللي تبكي وكان هو حياتي وحاضري ومستقبلي كنت دايرة مجهودي في داري وفخدمتي وتربيتي لوليداتي وعلاقتي بيه. رزقنا الله جوج وليدات من الدنيا تزوجو وشافو حياتهم بقيت انا وياه والحمد لله ظروفو مزيانة كنا مرة في الدار ومرة نخرجو ومرة نسافرووالا نديرو عمرة هكا كانت حياتنا. ولادي شايفين حياتهم والحمد لله فرحانين ومرتاحين هوما عارفينا ميسورين والحمد لله ما محتاجينش يصرفو علينا .هادي حياتنا اللي كنا عايشين هكا تصورو مايدوزش نهار بلا مانبوس يديه ليل ونهار وهو كدلك نفس الحب اللي كان هو اللي بقى ماتبدل والو و ماتغير حتى تفصيل في حياتنا اليومية. راجلي ماشي من النوع اللي يسهر ولا يمشي لقهاوي ديما نسهرو في دارنا اللي بنيناها بحب وكل حاجة فيها تشهد وتنطق. هادي أشهر جات واحد البنت كرات فوقي عمرها 30 سنة اعتبرتها بنتي نهار الي مانشوفهاش نمشي ندق عليها الباب ونشوف عشاها وغداها ديما من عندي. ونقولها نتي بوحدك اعتبريني بحال ماماك والمشكلة كنت ديما نعاود لها على راجلي بحب واي حاجة نذكرو فيها حيث كنعتبرو مثال أعلى ديما وقدوة لي.و كانت ديما كتدعي معاه وتقولي حتى نتي تستاهل . دازت الأشهر وجا راجلي قالي يا بنت الناس انا عمري مابغيت شي مرا في حياتي من غيرك وعمري ماخنتك ولكن دابا انا كنحب من جديد وهو كيبكي المشكل مانقدرش نخونك أكثر و لا نكذب عليك وبدا يبكي بالصوت قالي انا كنبغيها ومانقدرش نستغنى عليها وانت حياتي كلها وهي باغاني ناخذها ولا غادي تمشي بحالها وقالي الاسم ديالها . مع الاسف نفس البنت اللي درتها بنتي وتهليت فيها. جاني انهيار عصبي طحت لقيت راسي الكلينيك. منين وليت لاباس قالي بقاي نتي فدارك وانا فداري الفوق بطبيعة الحال انا صدمة بحال هادي ماقدرتش نقاومها مشيت عند ولدي و حسيت براسي مثقلة عليهم. المهم قدمنا قضية طلاق والجيران قالولي شرا ليها اثاث جديد ومطلعو لدارها بكل وقاحة. وليت ديما مازمة ونخمم وكنحاول ديما نهرب من الواقع ديالي والله كنموت الف موتة . انا عارفة المشكل ديالي ماعندو حتى حل وانا عارفة راسي غادي نكمل حياتي بوحدي والله كنبكي الدم . كنتمنى حتى وحدة ماتدوق الالم ديالي. دعيو لي ربي يفرج علي هادشي اللي طالبة .