قصة مغربية و داكشي

الجزء الأول :

كلنا وقعو لينا تجارب عمرنا ننساوها تجارب على اثرها تكونو فينا بزاف ديال الأحساسيس و المشاعر لي ختالفنا فالتعريف ديالها وكل واحد فاهمها بطريقتو يعني كل واحد فينا فاهم احساسيو و مشاعيرو انطلاقا من تجربتو الخاصة فالحياة ناخدو على سبيل المثال مفهوم الألم كل واحد و كيفاش فاهم الألم، لي عندو تجارب مع الفقر اوطوماتيكمون غيقولك الألم هو الفقر لي مخدامش غيقولك الألم هو البطالة لي تحرم من الطفولة ديالو غيقولك الألم هو اغصاب الطفولة لي تعرض للخيانة غيقولك الألم هو الخيانة لي معندوش واليديه غيقولك الألم هو اليتيم...الخ ولكن انا شناهو الألم بالنسبة ليا ؟ غنخليكم نتوما تستنتجو شناهو الألم بالنسبة ليا انطلاقا من التجربة ديالي الخاصة فالحياة هاذ التجربة غنبداها بالفلاش باك كلكم كتعرفو خاليد المغرابي لي هو الخوادري الكبير كان خدام على برا سيكيريتي دوز شي عامين و الصرف كان قليل فاش كيجي عدنا و قليل فاش كيصوني لينا حتال دابا معرفناش كيفاش حتا سهل عليه الله دغيا انا بعدا واخا كنت صغير كنت كنميز كانو كيقولو ليا نتا كبر من عقلك كنقول هضرة كبر مني شكيت فخاليد شكيت فخدمتو حيت شحال من ديكور كيوقع لنا معاه بعيد على المنطق ماعلينا ولفنا فراقو وكذا فالوقت لي كنتسناوه يرجع تقطعات علينا خبارو مدة شهرين هاذ المدة ماصونا لينا ما والو الواليد ما خلا ما دار مشا عند البوليس مشا للقنصلية تاع قطر حتا شي واحد ماعطاه راص الخيط لي زاد خلعنا هو سميتو مكايناش فالرحلات لقطر و المرات لي كيجي كان كيجيب معاه فلوس صحيحة هاذشي ركب فيا الشك بزاف د الشك مهم تخلعنا عليه بزاف مموافاش ليه وكان قالينا الكونطرا غتسالي ليه فعامين دابا راه زاد على ديك عامين شهرين خرا ومزال مرجع ديك شهرين دازت علينا كلها بكا و شكا و خلعة معارفينو حي معارفينو ميت الواليد قرر يتسلف و يتكلف و يمشي لقطر يقلب على خاليد الجيران و الناس د الدرب هوما لي تعاونو مع الواليد و جمعو ليه فلوس الطيارة و وقفو معاه على دوك الوراق و كذا عطلو غي الباسبور وجد دوك الوراق و كذا بقات ليه سيمانة باش بخرج الباسبور و من تما يمشي لقطر يقلب على خاليد واحد النهار فديك السيمانة لي كيتسنا فيها الواليد مريحين كنتغداو يالاه جيت من المدرسة حتا كنسمع الهضرة فالدرب و الناس مجموعة وكذا الواليدة كون جيتيها من قبل تلقاها خارجة للدرب تجيب التنقنيقة كانت ضروري خاصها تجيب التبركيكة خاصها تعرف شنو واقع ولكن منبعد ما غبر خاليد تبدلات مابقا كيهمها والو بغات غا ولدها يرجع ليها انا بالعقل د الصغر ضرني راصي بغيت نعرف اش واقع طليت من الشرجم كتبان ليا ميرسيديس كحلة مجموعين عليها الدراري ديال الدرب شوية كيبان ليا خاليد وسطهم متيقتش فاللول قلتها للواليدة خرجات كتجري لعندو اشمنك يا بوسان و يا تعناق و آخيرا الخواذري رجع و رجعات معاه الضحكة للدار من بعد ما جا كملنا حياتنا نورمال عايشين بيخير ماخصنا والو حتال النهار لي قرر خاليد يتجوج بنجاة الله يرحمها فنهار عرسهم وقعات الواقيعة لي غتبدل ليا حياتي رأسا على عقب أول مرة يبان ليا خاليد مخلوع و وجهو صفر هو داك النهار من وسط العرس هز الواليدة وهزني وغادي هربان بينا برا العرس وصا علينا صاحبو ومشا البقية راه كتعرفوها مفهمت والو علاش وكيفاش دكشي لي باغي نعرف بغيت نعرف السباب تاع ديك الواقيعة شكون لي قتل الواليد و حرمني من الواليدة و حرم الخواذري من عرسو و قتل نجاة الخواذري فاش كان متورط فاش كان مدخل لراصو لدرجة يتبعوه من قطر تال هنا باش يقتلوه بزااف تاع الأسئلة فراصي باغي ليهم جواب يقدر يكون كاع هاذ الأسئلة عندهم جواب واحد ملي وقعات ديك الواقيعة دخل خاليد للحبس تحكم ب15 سنة حيت دعاوه بزااف تاع الناس و شهدو فيه بزاف هاذو لي دعاوه و شهدو فيه هوما لي ماتو ليهم حبابهم فعرس خاليد كانو متأكدين بلي كان مدخل راصو فشي حاجة عليها مسمحوش ليه و هاذ الناس نفسهم لي جمعو للواليد فلوس الطيارة باش يقلب على ولدو شوف التناقض ولكن مكنلومهمش الكبدة هاديك و الفراق صعيب سولوني انا و الواليدة لي مقدراتش تصبر لهاذشي كلو مقدراتش تصبر لفراق راجلها لي مات من جهة و فراق ولدها لي فالحبس من جهة خرا و عاد الموت لي وقعات فالعرس د ولدها هاذشي صعيب يتحملو شي واحد الواليدة الله يرحمها بقات كتخبي تخبي حتا وصلات للحد ماتت بالفقصة شفت مع الواليدة لي ماننسا شفت معاها لي ميتشاف تخايل معايا تشوف مك كتبكي ليل ونهار متاكل متشرب ونتا مقادر دير والو دير راصك فبلاصتي شنو غدير انا بعدا معرفت مندير خصوصا كنت فواحد السن لي مكيخول ليا ندير والو مافيدي والو خاليد دوز شي 3 الشهور فالحبس حتاشي واحد ما قدر يقولها ليه قررو يخبيو عليه موت الواليدة مؤقتا حتا هو عالم بيه غي الله مسكين مات ليه باه قدام عينيه و مرتو كذلك و هاهي الواليدة تاهي ماتت كية ورا ختها هاذشي كامل حقدني ديال بصح بسباب هادوك لي تبعو خاليد تال هنا تحرمت من شحال من حاجة فعمري 8 السنوات فهاذ العمر ماعندي لا ام لا اب لا اخ فلمحة بصر فقدت كلشي فهاذ السن بالضبط قطعت على راصي وعد الموت ديال الواليدة و الواليد و نجاة و كاع هاذ الناس لي ماتو فالعرس د خاليد هاذشي كلو لي وقع مغاديش يمر مرور الكرام غيجي النهار لي نوقف براصي و نفهم كلشي ديك الساعات نصفي الحسابات لي مقدرش خاليد يصفيهم من بين الناس كلهم لي حاقدين على خاليد الواليدين ديال نجاة هوما لي نورمالمو خاص يحقدو عليه و ميبقاوش يحملوه و مايجي منو حيت بسبابو ماتت بنتهم ولكن العكس بقاو كيحبوه و وقفو معاه فالمحكمة و قالو حسبي الله و نعم الوكيل كان ايمانهم قوي و تايقين بلي دكشي كان مكتاب شاء الله وما قدر فعل ملي ماتت الواليدة الأمل لي بقا ليا فهاذ الحياة حسيت براصي مابقا عندي تواحد داك الإستقرار لي كنت عايشو بحالا عمرو ماكان من وسط هاذ الحيرة و الألم و الحزن و المآسي لقيت فجنبي غي العائلة تاع نجاة الأم ديالها و الأب ديالها لي غادي يوليو واليديا التانيين منبعد الأم ديال نجاة الله يرحمها خالتي صليحة و عيسى راجلها دواو مع خوالي و عمامي باش يتبناوني و يربيوني بحال ولدهم حيت بنتهم الوحيدة ماتت و فعلا وافقو و وليت كنعيش مع خالتي صليحة و عمي عيسى صدقو طيبين القلب ديال بصح قلبهم بيض من التلج رحبو بيا و داروني بحال ولدهم و كثر واخا فاللول جاتني صعيبة ننتاقل من وضع لوضع ولكن ولفت قربات تسالي شهر على موت الواليدة و خاليد مزال مافخبارو والو كترات القيل و القال بين العائيلة بلي خاص يعرف و فدوك ليام نيت جا عندنا واحد الراجل كيسول عليا فايتلي شفتو ولكن نسيت رجعت الكاسيطة اللور تفكرت نهار العرس كان وصاه خاليد باش يشد الواليدة و كذا صراحة كون مكانش كون ماتت الواليدة مع الواليد بالقرطاس داك النهار قاليا سميتي مروان و انا صاحب خوك وكذا و بدا كيسول فيا اش خاصني و هذا و عزاني فالواليدة قلت ليه مامشا معاك باس قلت ليه ولكن راه خاليد مزال معارفش بلي الواليدة ماتت قاليا ليا لا راه عارف قلتها ليه ليوم فالصباح فالزيارة صدمني ملي قالها حيت مابانش ليا فالعزو شوية هو يجبد واحد الضرف قاليا هاذي رسالة من عند خوك خاليد صيفطها لك من الحبس خديتها قلت ليه شكرا و كذا قاليا مكاين لاش نتا راك خويا و كثر هاهي نمرتي عندك الى خصاتك اي حاجة كيما كانت ولا عندك اي مشكل كيما كان عيطليا و راني متأكد بلي صليحة و عيسى غيتهلاو فك تهلا فيهم حتا نتا صراحة بورشني بهاذ الهضرة مشا دوا مع خالتي صليحة و عمي عيسى و عطاهم بحال الرسالة لي عطاني طلعت لبيتي هاذ ليام وليت كنسها بزاف حتا البكا مابكيتش بزاف وخا قلبي عالم بيه غا الله ولكن انا من النوع لي كنبكي من لداخل مكنبينش او دابا عرفتو شناهو الألم بالنسبة ليا ؟ تفكرت ديك الرسالة لي صيفط ليا خاليد من الحبس حليتها و كنقرا فيها...يتبع (أكرر أأكد أنوه الى بغيتي تفهم هاذ القصة تأكد انك تكون قريتي القصة الفايتة)

خلي رأيك 

Add caption