قصة مغربية بالدارجة و داكشي

الجزء الخامس

فاش كنا واقفين فالضو الحمر سمعت شي حاجة ورانا كنتلافت كتبان ليا ميرسيديس صايكها واحد كيشبه لخاليد قلبي تزعزع فالبلاصة حيدت الصمطة و حليت باب الطاكسي غادي خارج قاصد ديك الميرسيديس كان كطلع الجاج كحل مبقا كيبان ليا والو لداخل شوية كنسمع الكلاكصونات ديال الطوموبيلات فجنبي حيت شعل الضو الخضر كتبان ليا الميرسيديس ديمارات مشات فالبلاصة دريس كيعيط ليا من الطاكسي رجعت لطاكسي قاليا اسبحان الله مالك قلت ليه لا والو غي واحد خونا تشابه ليا مشينا فحالنا وانا غكنفكر فديك اللحضة فاش شفتو معرفتش واش هو ولا لا يقدر يكون تشابه ليا ولكن الى كان حي بصح بنسبة كبيرة يقدر يكون هو ولكن مالو ميجي عندي نيشان اش حابسو اش كيخور هذا تزادت الرغبة ديالي نمشي لكلومبيا نسول ديك ختنا صافي نسيت وحيدت من بالي هاذ لبلان على ود الإمتحانات بدينا البريباراصيو وكذا كنتجمعو حنا بتلاثة انا و سليمة و دريس كنراجعو و كذا راك فاهم دوزنا الإمتحانات عطاونا واحد عشرين يوم عطلة كتصوني ليا الواليدة كتقوليا رجع وكذا كنصدرها بديك راطراباج وكذا ملي سالينا صونيت لداك سوفو خو هاديك الكلومبية الو السلام السلام كذا الطن قلت ليه ايمتا غترجع لكولومبيا قاليا قريب فهاذ الليامات غنقطع البيي ديال الطيارة قلت ليه واش الفيزا ضروري قاليا الى كنتي غا كتقرا ماشي ضروري خلص غي الطيارة قلت ليه مزيانة ملي تبغي تمشي تصاوب دكشي تاع الطيارة صوني ليا نمشي معاك قاليا كون هاني راه شي يوماين من دابا غنبدا فيه قلت ليه عنداك تنساني قاليا متخافش واخيرا قربت نمشي نشوف ديك خايتي بان ليا دريس كيجمع حوايجو قلت ليه مالك فين غادي قاليا غندوز العطلة فالمغريب تبدا القرايا عاد نجي قلت ليه سير عالله الله يعاونك قاليا ملي تمشي لتما علمني باش ما كان صافي قلت ليه كون هاني لغد ليه مشا هو للمغريب بقيت غا بوحدي هنايا بالليل نايض كنصاوب عشايا حتا كيدق الباب مشيت نحل كتبان ليا سليمة هازا بيتزا قالت ليا يكما كتصاوب العشا قلت ليها لقيتيني يالاه نضت ليه هي دخل قالت ليا صافي حبس هاهو العشا صنطيحة هاذ الدرية جاب لينا الله العشا بعدا وتحية للثلج معرت اش بدات تتخور فالتلفازة دارت واحد الفيلم بقينا داويين شوية تعشينا و كذا و معرت كيفاش اخويا تا ولينا دايرين شي فشي الشيطان اخويا يخ يخ ثف ماعلينا فايق الصباح على صوت التيلي كيصوني هذا سوفو الكلومبي الو السلام السلام كذا الطن قاليا راه ليوم غنبدا نطلع فوراق الطيارة و البيي و كذا قلت ليه صافي من هنا ساعة ساعة ونص نتلاقاو قاليا سير عالله قطعت لقيت ديك سليمة فايقة قالت ليا شمن طيارة واش راجع للمغريب قلت ليها لا غادي لكلومبيا مع هداك ديال داك النهار قالت ليا ااه نسيت نضت دوشت و كذا راك فاهم لقيتها حاطا الفطور هو فالصراحة لواحد هو لي يضربها بشي تجويجة يلقا الفطور واجد العشا واجد كلشي واجد حسن من هاذ التازوفريت ولكن كيما وجدات ليا الفطور غتكون وجداتو لشي واحد خور هذا هو المشكل عدنا كنفطرو و داويين بدات كتقلقل فيا على المشية لكلومبيا وكذا الطيارة الفيزا الطن شرحت ليها لبلان كيفاش هي تقوليا بغيت نمشي معاك صدماتني قلت ليها واش داويا على كلومبيا قالت ليا وايه قلت ليها ولكن علاش قالت ليا غا بغيت نبدل الجو وصافي كنت غنرجع للمغريب ولكن طلعلي فراصي قلت ليها معرفتش شنو غنقولك والله غير غتخسري فلوسك لي جمعتي من الخدمة على والو قالت ليا لا راه داك الريسطو ديال خالتي ملي مكنلقا منظير كنخدم معاها قلت ليها ملي هاكا معندي منقولك لي بغيتي قالت ليا ويالاه نمشيو عند الدري كون راه كيتسنا قلت ليها اه عندك الصح خديت الباسبور و دكشي لي غنحتاج مشات حتاهي جابت دكشي لي غتحتاج صونيت لداك الدري قاليا نتلاقاو فالقنصلية مشينا لعندو خلصنا البيي ديال الطيارة و شي تخربيق الطيارة غدا فالعشية رجعنا فحالنا سليمة رجعات عند خالتها تجمع حوايجها رجعت فحالاتي تانا جمعت حوايجي لغد ليه معول نمشي للحمام تفكرت بلي هنا معندهمش الحمامات بحالنا عندهم شي حاجة فشكل وكشي مخلط نسا ورجال استغفر الله النهار دايز بالخف وصلات الساعة لي غطير فيها الطيارة تلاقينا حنا ب3 قدام المطار فاليدينا الباسبور ودكشي ركبنا فالطيارة نيشان لكلومبيا شي ساعتين و الصرف ولا 3كاع مهم وصلنا البلاد عندهم فشكل هنا قلت لداك سوفو داركم واش بعيدة من هنا قاليا اه شوية حنا كنسكنو فواحد الحي شعبي شدينا واحد الكار تاهو شي ساعة و الصرف نزلنا منو شدينا طاكسي واحد نص ساعة و الصرف نزلنا شديناها رجيلة واحد 10 الدقايق و الصرف وصلنا لداك الحي لي ساكن فيه نيشان لدارهم بدا كيدق الباب هي تخرج واحد المرا شارفة بعكاكزها قاليها جدة بداو يتعانقو قاليها جبت معايا شي ضياف و كذا دخلنا سلمنا عليها ريحنا جابو لنا مناكلو قاليا ختي ميا غتكون مزال مجات من الخدمة قريب تجي قلت ليه ماشي مشكل ريحنا كنتسناو داوي مع ديك سليمة جداه كتقلقل فينا كل شوية تقول شكون نتوما واقيلا فيها الزهايمر ولا منعرف بقينا هاكاك دازت واحد ساعتين و الصرف كنسمع الباب كيدق واقيلا هاذي ميا لي كدق مشا سوفو يحل الباب كنسمع صوت راجل جا دخل سلم علينا قالينا سوفو هذا راجل ختي ميا نقز داك راجل ختو قاليه شكون هادو قاليه هادو كيقراو معايا فسويسرا مهم القصة طويلة تتجي ميا و تعاود لك وجد الزرواطة يبان الكلب من حيت لا ندري وقفات علينا واحد خايتي كتعنق فسوفو واقيلا هاذي هي ميا بدات كتسلم علينا وصلات لعندي بدات كتشووف فيا بواحد الطريقة فشكل نقز سوفو قاليها هذا سميتو المامون تلاقيت معاه فسويسرا فالبلاصة لي كنقرا فيها وجا معايا من تما باش يدوي معاك فشي حاجة قالت ليا فاش باغي دوي معايا واش كتعرفني شداتني اللقوة فديك اللحضة بديت كنتمتم عليها هي تنقز ساليمة كتفهمني هاذي قالت ليها يلا ممكن يهضر معاك على انفراد هو ينقز راجل خت سوفو راجل ميا زعما قالينا سيرو للصالة وهضرو على خاطركم فاللول يسحابلي غيبدا يسب حيت انا يجي شي واحد يهضر مع مرتي على انفراد غنفرد ديلمو مكاين ما ولكن ولكن هوما عندهم ثقافة فشكل تنعس ليه مع مرتو على انفراد معندوش مشكل ماعلينا مشينا لواحد الصالة جريت معايا ديك سليمة لواحد هو لي يدير اوطونسيو هاذشي ديال الإنفرادات معنديش معاه ريحنا قالت ليا ياك لاباس قلت ليه الموهيم شي عشرسنين من دابا تبرع ليك شي واحد بصاك د الفلوس على ود خوك ياك ؟ قالت ليا اه وهاذشي وقع شي عشرسنين علاش كتسول قلت ليها انا كنقلب على خويا الكبير سميتو خاليد قاليا صاحبو عطاك شي فلوس على ود خوك لي مريض بالسرطان و بالصدفة تلاقيت مع خوك فسويسرا حيت كيقرا معايا فنفس الجامعة وجابني تال هنا و انا باغي اي معلومة ممكن تفيذني باش نلقا خويا الى كنتي عارفا شي حاجة نتمنى متخبيهاش عليا قالت ليا اه سمح ليا الى تفاعلت ولكن وقعو ليا مشاكل بزاف بسباب هاذ الفلوس لي عطاني خوك اه وراك كتشبه ليه ملي سلمت علك قبيلة كنقول فين شايفاك قلت ليها ماشي مشكل ولكن شنو وقع لك بسباب خويا قالت ليا خوك ملي عطاني دوك لفلوس كان وسطهم واحد التيليفون ستعملتو منبعد كتاشفت بلي فيه نظام

GPS جيبي ايس منوراها بشي شهر جات لعندي واحد العصابة للدار يسحابلي كيقلبو على فلوسهم ولكن كيقلبو على لي خدا الفلوس لي هو خوك قالو ليا بلي قتل ليهم شي شاف ولا منعرف وبغاو ينتاقمو منو كان ديك ساعات سوفو يالاه دار العملية كان باقي فالسبيطار كانو ديما كيجيو ليا للدار يرونوها و يضربونا ويهددوني الى ملقيتش ليهم العنوان ديال خوك خاليد غيقتلونا انا كنت عارفة بلي هو من المغريب وكنت عارفة فين كان خدام قلت ليهم دكشي لي كنعرف كون مقلتش ليهم كون قتلو ليا عائيلتي وصافي من تما مابقيت شفتهم مزال ملي سالات هضرتها محسيتش براصي تابديت كنبكي قالت ليا مالك كتبكي وخوك اش وقع ليه منبعد حيت من داك نهار مابقيت شفتو قلت ليه واش عارفا شنو درتي ولا لا باش تعتقي عائيلت ماتت العائيلة ديالي دوك الناس لي قلتي ليهم دكشي لي كتعرفي خلاوني يتيم قتلو ليا الواليد ديال نهار العرس ديال خاليد لي قتلو ليه خاطيبتو وبزااف د الناس ابرياء ماتو فداك العرس تحكم خاليد ب 15 عام دالحبس منوراها الواليدة ماتت بالفقصة من تما مابقيت شفت خاليد معرفتو ميت ماعرفتو حيت كنضرب على ديك ميا كتبكي و سليمة تاهي ميا وقفات على ركابيها كطلب مني السماحة قلت ليها مكاين لاش تطلبي السماحة كون كنت بلاصتك غندير نفس الشيئ باش نحمي عائيلتي فالآخير كيبقا هاذشي مكتاب هي تقوليا ولكن راه حذرت خاليد قلبت على صحابو لقيت واحد فيهم كان هيندي على مكنظن مشيت لعندو تال قطر فواحد المستشفى كان مريض شرحت ليه شنو وقع قاليا غيمشي للمغريب يحذر خاليد قلبت على النمرة ديالو من القنصلية المغربية لي فقطر صونيت عليه باش نحذرو قطع عليا وشحال وانا كنصوني عليه منوراها مجاوبنيش...بديت كنمطق دكشي لي قالت مع دكشي لي قاليا مروان مع دكشي لي وقع فالعرس دابا عاد عرفت شنو وقع بالضبط النار لي بردات زادت شعلات فقلبي شعلاتها الهضرة ديال ميا قلت ليها شنو دابا معارفة والو على خاليد قالت ليا لا معارفة والو سمح ليا قلت ليها ماشي مشكل غنخلي ليك النمرة ديالي الى تفكرتي شي حاجة صوني ليا قالت ليا مرحبا ولكن فين غاديين دابا قلت ليها لشي اوطيل قالت ايمتا غترجعو فحالكم قلت ليها مقطعين الطيارة آلي روتور منبعد خمسيام غنرجعو لسويسرا قالت ليا اوا على هاذ الحساب بقاو عدنا هنا هاذ خمسيام مرحبا بيكم قلت ليه ولكن...قالت ليا مكاين ما ولكن الخير لي دار فيا خوك عمرني ننساه واخا كنت انا السباب باش ماتو حبابكم نتمنى تسمحو ليا و بزاف قلت ليها مكاين لاش والله قررنا ندوزو ديك خمسيام تما لغد ليه فقنا وفطرنا و كذا سوفو خرجنا نتساراو تما فكلومبيا فشكل عندهم الدنيا هنا عجباتني بزاف حتا الثقافة ديالهم مقودة دوزنا تلثيام غاضوران انا و سليمة هنا تاهي فرحانة باقي نهار ونرجعو فحالنا فواحد الليلة كنتسركلو كيما العادة دايزين ن حدا واحد الحي شعبي وقفو علينا واحد الربعة واحد فيهم جبد موص كبير باغيين يكريسيونا حتا هنا عندهم الكريساج امعلم درت سليمة ورايا موشكيلة مع هاذو ومخرجين معانا الباسبورات على ود السياحة الى داوهم غيخليونا مرهونين هنا كنتلافت كتبان ليا واحد الزرواطة مشيت ليها مع هزيتها تكيت على هداك لي هاز الموص واحد الدقة معرفتهاش منين جاتني سليمة غا كتغوت بحال شي بنت اه نسيت هي بنت تعصبت فديك اللحضة وانا غا على سبة ظقة هنا دقا لهيه ترونات واحد الجوج ضربت عليهم غاديين لسليمة معرت كيفاش دكشي وقع بالزربة جا واحد الوحش هزهم بجوج ضربهم مع لارض جا للخرين كنت مشاد معاهم تاهوما نفس لبلان كنضرب ليه على وجهو هذا فايتلي شفتو هو مطايف معاهم وانا مرجع الكاسيطة لور هذا الهيندي لي جابو خاليد يدوز معانا العيد ولكن اش كيدير هنا كنضرب على لخرين محاميين عليه هزيت ديك الزرواطة نعام سيدي و كنضور عليه للضهر دقة دقة للواحد كلشي هرب جا عندي داك الوحش قاليا يكما وقعات لك شي حاجة قلت ليه عرفتك نتا الهيندي صاحب خويا خاليد قاليا غير تشابهت لك كنت دايز وبنتي ليا مطايف وتدخلت سالا هضرتو ويمشي قلت لسليمة تمشي للدار عند ميا تسناني و مشيت كنجري تابع داك الهيندي كتقوليه وا غا اجي نهضر معاك واهيا وهو والو ماعلابالوش ركب فواحد الطوموبيل ومشا وقفت طاكسي قلت ليه يتبع ديك الطوموبيل لي ركب فيها غادي وحالف منفلتو حتا نعرف اش كاين تما...يتبع