قصة مغربية و داكشي الجزء 6

الجزء السادس

ملي وقع داك البلان مشا داك لي علبالي بلي الهيندي فطوموبيل فالبلاصة وقفت طاكسي قلت ليه يتبعو حالف منفلتو الليلة خاص نفركع هاذ الرمانة صافي بقينا تابعينو فيما ضار نضورو فيما وقف نوقفو بقينا هكاك واحد روبوع ساعة هو يوقف وسكت الطوموبيل نزلت بالخف غادي قاصدو كنجري قبل ميديماري قربت لعندو هو يحل الباب لي على الليمن غا الراصو بغاني نطلع معطلتوش تانا طلعت و سديت الباب كنحقق ليه فوجهو ميحيدهاش ليا من هذا الهيندي لي دوز معانا العيد هو واخا دازت سينين ولكن الله وهبني بقوة الداكرة قاليا مالك تابعني قلت ليه كيفاش مالي واش بنت لك كنرضع فصبعي نتا هو لي جابك خاليد دوزتي معانا العيد الكبير قاليا اه هو انا ومنبعد فين كاين المشكل قلت ليه واش باغي تركب فيا السكار واش باغيين تهبلوني كل شوية يبان واحد فيكم من العدم و مباغينش تفهموني بلا متقوليا هاذي صدفة نتا كنتي حاضيني قاليا اه وصاني عليك مروان نتبعك لهنا خاف لتوقع لك شي حاجة قلت ليه وهو باش عرفني جاي هنا وعلاش عينيكم فيا شكون لي محرشكم شكون لي مخلصكم قاليا اش كتخور واش هاذي هي شكرا قلت ليه بلا مدوخ عليا مؤخرا بان ليا خويا خاليد فسويسرا متأكد هو وبعدها بيامات كتبان نتا راه فرشتوها عارف بلي خاليد حي بدا كيشوف فيا قاليا غير كيبان لك خاليد من داك النهار المشؤوم مابقيت شفتو و حيت كان صاحبنا و حبيبنا وصانا عليك عليها تبعناك تال هنا هاذشي لي كاين عصبني فديك اللحضة قلت ليه بالداريجة سير غا تقاود نتا وخاليد ومروان وكلشي نزلت غادي فحالاتي قاليا قود هو نتا كنت معصب ولكن ملي سمعتو قالها بالداريجة مع هو هيندي بحال دوك موناميات لي كيجيو للمغريب وتعلمو الداريجة ماعلينا واخا هكاك جعرني غادي راجع فحالي عارف بلي مغنصور منو لاحق لا باطل قاليا طلع نوصلك قلت ليه وصل مك قاليا مك هو نتا تاهي قالها بالداريجة علاام هاذ الهيندي معرت منعندمن تآنسبيرا المعيور المغريبي شديت طاكسي و غادي راجع فحالاتي غدا غنرجع لسويسرا مشيت لقيتهم موجدين العشا و كذا بداو كيسولو فيا فين كنتي و كذا و الطن قلت ليهم لبلان كيفاش مشيت ننعس وكنفكر فدكشي هوما باش عرفوني جيت لهنا وكيفاش تاطاحو على البلاصة بالضبط يكونو ركبو معايا فالطيارة زعما آو لهاذ الدرجة راصي خرج منو الدخان شفت مع هاذو اللخر بقيت كنفكر تا داني النعاس فايق على صوت سليمة فطرنا و جمعنا حوايجنا و كذا تسالمنا مع هادوك و غاديين للمطار سوفو كاع مرجع معانا القراية اصلا باقي عليها الحال وليت غادي وكنتلافت ورايا ولا فيا الوسواس دعيناهم الله وصلنا للمطار فاليدينا دكشي كلشي داز مزيان منوراها بشي ساعتين و الصرف لقاتنا فمطار زيورخ سليمة مشات لعند ديك خالتها ولا منعرف اش كتجيها هاذ سليمة تاهي معرت مالها بحالا لصقات فيا خلي تنسالي ليها دابا بالي غي مع داك المرضي باقا شي عشريام للقرايا الواليدة كتصوني ليا خاص نمشي عندها تاهي نشوفها ضروري لغد ليه مشيت قطعت الطيارة للمغريب الحوايج بقاو مجموعين فلاباليز كنحس براصي بورجوازي و مبعصص يلا دويت بالفرونسي وانا مقااودة عليا صو خليني غا فالداريجة مهم رتاحيت يوماين و مشيت للمغريب نيشان للدار توحشتهم قهروني الدار غا بالأسئلة فين كنتي فين جيتي اش كتاكل اش كتشرب كتغطا كذا الطن من هنا الطن ملهيه مقلتش ليهم على لبلان ديال كلومبيا...الى قلت ليهم مغاديش نعتب ديك سويسرا اللهم خليهم معارفين والو والحاجة المستورة كيسهل فيها الله مهم دازت شي عشريام تقريبا دازت طووب مع الدار مسخيتش بيهم ولكن القراية غتكون بدات رجعت تاني لسويسرا عندي عامين خاص نقراها باش ناخد واحد الديبلوم اما الإجازة خاص نزيد شي 8 الشهور تقريبا السيستيم د القرايا هنا فشكل ولكن الديبلومات تاعهم معترف بيهم عالميا ماعلينا رجعت لسويسرا لقيت دريس ديجا رجع كملنا قرايتنا نورمال كنقراو شوية كندوزو متيحانات وكذا مهم كنفكر كيفاش غنلقا داك المرضي راصي كيتبلوكا ولكن هو ماباغينيش نلقاه سباب اش والله معرفت انا باقي غا نتلاقاه نفركعو هاذ الرمانة ديك ساعات لا بغا يكمل هاكا هو حر غير انا ميبقاش ضارني راصي وليت باغي غا نحط راصي على المخدة و يديني النعاس بلا منفكر فهاذ الحزاق اودي كتبقا تفكر تفكر حتا كتحقد البشر مكيتفهمش مهم كملنا حياتنا عادي انا ودريس وسليمة كنقراو مجموعين كنحفضو مجموعين مهم شي بلانات كنشوفهم على سليمة مكيتفهموش ليا كنغمض عليها عيني بحالاش مثلا مفهمتش السيدة لاصقة فيا بواحد الطريقة ممفهوماش كتمشي معايا وتجي معايا فيها سوالات بزاف خاصها تعرف عليا كلشي حتا كيدخلني الشك ممكن تكون طايحة و كذا ولكن مهم خلينا منها دابا نهار على نهار سيمانة على سيمانة شهر على شهر تا وصل رمضان هاذ العام غنصوم رمضان فالغربة باقي نعقل اصعب رمضان داز عليا هو لي قبل بعشرسنين من دابا راكم عارفين سباب اش مهم فشكل رمضان هنا كنتحنسرو فالشهيوات و الحريرة و كذا كنضطرو نطيبو شي لعيبات هنا مرة مرة سليمة كتفطر كتجي تفطر معانا دازت عشريام وباقي مدقتش الحريرة كنشوف بنادم داوي عليها فالفايسبوك الريق دياب فمي كيتقلع بقينا هاكاك تال واحد النهار قلنا والو غنطيبو الحريرة تجمعنا حنا بتلاثة كل واحد شنو كيدير جمعنا الحمص و العدس الكرافس اي حاجة كتكال درناها فديك كوكوط واحد الريحة خرجات كتفكرك فريحت المغريب ماعلينا كنتسناو الآذان اذن صلينا كذا مشيت نجيب الحريرة محبوبة الملايين من الكوزينة غادي بيها وانا اكبر معكاز مكنحملش نرجع للكوزينة جوج مرات خاص ندي معايا كلشي هاز الحريرة فليد و الجبابن بلين والمعالق تحت الإبطين بقا خاصني نطفي غا الضو د الكوزينة ملقيت باش نطفيه طفيتو بنيفي معرت كيفاش مبغاش يطفا ضاربت معاه فقدت التوازن طاحت ليا الحريرة من ايدي تشرشمات فالكوزينة طاحو الجبابن تعرسو المعالق صدقت لا حريرة لا جبابن لا معالق الضو هو اللخر ماطفاش الشمتة جاو عندي كيجريو بان ليهم داك الديكور بدا كيترمضنو عليا وانا خاري بالضحك فاللول كنت باغي نجمعها ليهم اودي العكز لا دين له درنا بالناقص كاع من الحريرة عدينا غي بداكشي تا دازت شي يامات عاد جابت لينا سليمة الحريرة جابتها من الريسطو ديال خالتها مهم خرج رمضان باقي لينا شي شهورة قلال ونساليو العام اللول د القرايا واحد النهار مكونيكطي معليا ما بيا حتا صونات عليا واحد النمرة جاوبت الو السلام كذا الطن شكون معايا خونا كيهضر بلونغلي قاليا واش نتا هو المامون فلان قلت ليه اه شكون نتا قاليا واش باقي كتقلب على خوك زعزعني ملي قالها قلت ليه شكون معايا بعدا قاليا ماشي مهم شكون انا الى باقي تتقلب عليه راه عندي معلومات غتعاونك تلقاه قلت ليه وشنو المقابل قاليا نتلاقاو ونتفاهمو على المقابل قلت ليه وباش عرفتك داوي بصح قاليا الى بغيتي مرحبا الى مبغيتيش قولها ليا نقطع قلت ليه صبر عليا نفكر انا غنعاود نتاصل بك هو يقطع ضورتها فدماغي مزيان هذا عارفني كنقلب على خويا وعارف سميتي ماشي بعيذ يكون داوي بصح فديك اللحضة طمعت يقدر يكون داوي بصح خلي حتال غدا ونقرر الليل كلو وانا كنفكر فهاذ لبلان دريس مقلت ليه والو مشيت للافاك و سااهي تلاقيت مع سليمة السلام السلام كذا الطن قالت ليا مال وجهك نبدل بنتي ليا ماشي نورمال قلت ليها لا غير جاب لك الله قالت ليا شوف راه كنعرفك مزيان قوليا مالك صدقات هاذ سليمة كتفهمني عاودت ليها البلان لي وقع ليا لبارح هي تقوليا مزياانة مضيعش ديك الفرصة سير وشوف غير ملي عارفك كتقلب غلى خوك وسميتك راه غيكون عارف شي حاجة مالك اش خاسر بدات عليا بديك الهضرة زعماتني ملي رجعت للدار صونيت لديك النمرة قلت ليه فين غنتلاقاو نعت ليل واحد البلاصة كتكون خاوية غدا مع العشرة د الليل قلتها لسليمة قالت ليا نمشي معاك و كذا قلت ليها لا غنمشي غي بوحدي تاهي محكراتش عليا باش تا يلا وقعات شي حاجة توقع ليا غا بوحدي مبفيت توقع ليها تاحاجة بسبابي هي هاديك ضار النهار بالخف وصلات العشرة دالليل لقاتني فالبلاصة لي قاليا داك خونا تسنيت واحد الشوية كنصوني عليه مكيجاوبش شوية كتبان ليا واحد الطرافيك بيضة وقفات قدامي غالبا خونا جاي فيها نزلو تلاثة من عند الله تخلعن نضت من بلاصتي بانو ليا جايين بواحد الطريقة دارت فيا الشك وفهاذ الحالات مكنتيقش كنتلافت فجنابي بانت ليا حديدة هزيتها مفاهم والو لقاوني على القرص لي قرب عندي كنجبد عليه تمرمدنا تما هوما 3 دقة هنا عشرة لهيه كليت مكال الطبل نهار العيد وانا مفاهم والو تانا تكلخت جاي عندهم بوحدي ومدايرش السوكور ترونات تما طلعوني لديك الطرافيك ربطوني من يدي و رجلي هاذو أول مرة نشوفهم بقيت كنترطا ونغوت تما رونت ليهم ديك الطرافيك حررت رجلي وبقيت كنضرب هنا ولهيه حتا كنحس بشي برا فعنقي من ديك اللحضة مبقيت عاقل على والو حال عيني وسط واحد البيت صغير مليوح فواحد السداري و مربوط ودايرين ليا فاصمة كحلة فعيني بقيت معاها حتا حيدتها مبقيت فاهم والو شكون هاذو لي خطفوني اش واقع هنا تاني...يتبع